ನಾಡವರ ಸಮಾಜ ಬೆಂಗಳೂರು, ಇದು ಪ್ರತಿವರ್ಷ ಕನಿಷ್ಠ ನಾಲ್ಕು ವಿಧವಾದ ಕಾರ್ಯಕ್ರಮಗಳನ್ನು ನಡೆಸುತ್ತಾ ಬಂದಿದೆ.ಅವುಗಳೆಂದರೆ:

1.ಬೆಂಗಳೂರು ನಾಡವರ ಬಂಡಿಹಬ್ಬ

ಸಮಾಜದ ಕಾರ್ಯಕ್ರಮದ ಪಟ್ಟಿಯಲ್ಲಿ ಬಂಡಿಹಬ್ಬ ಕಾರ್ಯಕ್ರಮವು ಅಗ್ರಸ್ಥಾನವನ್ನು ಪಡೆದಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಸಮಾಜ ಬಾಂಧವರು ಕುಟುಂಬ ಸಮೇತರಾಗಿ ಮಕ್ಕಳೊಂದಿಗೆ ಭಾಗವಹಿಸಿ ಕುಲಬಾಂಧವರೊಂದಿಗೆ ಬೆರೆತು ಕುಶಲೋಪರಿಯಿಂದ ಕಾಲ ಕಳೆಯಲು ಇದೊಂದು ಸದಾವಕಾಶವನ್ನು ಒದಗಿಸಿದೆ. ಬೆಳಗ್ಗೆಯಿಂದ ಸಂಜೆಯವರೆಗೆ ವಿವಿಧ ಕಾರ್ಯಕ್ರಮಗಳಿದ್ದು, ಮಕ್ಕಳೊಂದಿಗೆ ಬೆರೆತು ಖುಷಿಪಡುವ ದಿನವಾಗಿರುತ್ತದೆ. ಬೆಳಗ್ಗೆ ವಿವಿಧ ಕ್ರೀಡೆಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ಬಹುಮಾನಗಳನ್ನು ಪಡೆಯುವ ಅವಕಾಶ, ನಂತರದಲ್ಲಿ ಊರಿಂದ ತಂದ ನಾಡವರ ಮೆಚ್ಚಿನ ಶಿಟ್ಲಿನ ಸಾರು ಹಾಗೂ ಕುಸಲಕ್ಕಿ ಗಂಜಿ ಸವಿಯುವ ಅವಕಾಶಗಳಿರುತ್ತದೆ. ಸಂಜೆ ನೃತ್ಯ, ನಾಟಕ, ಯಕ್ಷಗಾನಗಳನ್ನೊಳಗೊಂಡ ವಿವಿಧ ಮನರಂಜನಾ ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ಊರಿನಲ್ಲಿ ಮಾಡುವ ಕೋಳಿ ಸಾರು, ಅಕ್ಕಿರೊಟ್ಟಿ, ವಡೆ ಸವಿಯುವ ಸುವರ್ಣವಕಾಶ. ಎಲ್ಲದಕ್ಕಿಂತ ಮಿಗಿಲಾಗಿ, ಎಲ್ಲರೊಂದಿಗೆ ಕುಳಿತು ಸಹಭೋಜನ ಮಾಡುವ ಖುಷಿ ಎಲ್ಲರದಾಗಿರುತ್ತದೆ. ಯುವಕರಂತೂ ಎಲ್ಲರಿಗೂ ಹೊಟ್ಟೆ ತುಂಬಾ ಊಟ ಬಡಿಸುವ ಸಂಭ್ರಮಕ್ಕಾಗಿ ತುದಿಗಾಲಿನಲ್ಲಿ ನಿಂತಿರುತ್ತಾರೆ.

ಇದರೊಂದಿಗೆ ಬಂಡಿಹಬ್ಬದಲ್ಲಿ ಒಳಗೊಂಡಿರುವ ಇತರೆ ಕಾರ್ಯಕ್ರಮಗಳು ಇಂತಿವೆ:

• ಪ್ರತಿವರ್ಷ ಬಂಡಿ ಹಬ್ಬದಂದು ವಿಶೇಷ ವ್ಯಕ್ತಿಗಳನ್ನು ಮುಖ್ಯ ಅತಿಥಿಯಾಗಿ ಆಹ್ವಾನಿಸಿ ಸನ್ಮಾನಿಸುವ ಕಾರ್ಯಕ್ರಮವಿರುತ್ತದೆ.
• ಶೈಕ್ಷಣಿಕವಾಗಿ ಸಾಧನೆ ಮಾಡಿದ ಎಸ್.ಎಸ್.ಎಲ್.ಸಿ., 2.0000.2., ಡಿಗ್ರಿ, ಪಿ.ಜಿ. ವಿದ್ಯಾರ್ಥಿಗಳನ್ನು ಗುರುತಿಸಿ ಸನ್ಮಾನಿಸಲಾಗುತ್ತಿದೆ.
• ಕ್ರೀಡೆಯಲ್ಲಿ ಸಾಧನೆ ಮಾಡಿದವರನ್ನು ಗುರುತಿಸಿ ಗೌರವಿಸಲಾಗುತ್ತಿದೆ.
• ರಾಜ್ಯ ಹಾಗೂ ರಾಷ್ಟ್ರ ಪ್ರಶಸ್ತಿ ಪುರಸ್ಕೃತರನ್ನು ಗುರುತಿಸಿ ಗೌರವಿಸಲಾಗುತ್ತಿದೆ.
• ರಾಜ್ಯ ಹಾಗೂ ಕೇಂದ್ರ ಸರ್ಕಾರದ ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಸಾಧನೆ ಮಾಡಿ, ಹುದ್ದೆ ಪಡೆದವರನ್ನು ಗುರುತಿಸಿ ಗೌರವಿಸಲಾಗುತ್ತಿದೆ.

ಈ ಹಿಂದಿನ ಹಲವಾರು ಬಂಡಿಹಬ್ಬದ ಕಾರ್ಯಕ್ರಮದಲ್ಲಿ ಒಟ್ಟಾರೆ ನಾಡವರ ಸಮಾಜದ ಈ ಕೆಳಗಿನ ಗಣ್ಯರನ್ನು ಗೌರವಿಸಿ ಸನ್ಮಾನಿಸಲಾಗಿರುತ್ತದೆ.

• ಶ್ರೀ ಎನ್.ಆರ್.ನಾಯಕ್-ನಿವೃತ್ತ ಪ್ರಾಂಶುಪಾಲರು ಹಾಗೂ ಸಾಹಿತಿಗಳು
• ಡಾ|| ನಿರಂಜನ್ ಕೆ. ನಾಯಕ್ - ವಿಜ್ಞಾನಿಗಳು, ಮುಂಬೈ
• ಶ್ರೀ ಮೋಹನ್ ಎಂ.ನಾಯಕ್-ಉದ್ದಿಮೆದಾರರು, ಮುಂಬೈ
• ಶ್ರೀ ಎಸ್.ಆರ್.ನಾಯ್ಕ-ಉಚ್ಚ ನ್ಯಾಯಾಲಯದ ನಿವೃತ್ತ ಮುಖ್ಯ ನ್ಯಾಯಾಧೀಶರು ಹಾಗೂ ಮಾನವ ಹಕ್ಕು ಆಯೋಗದ ಅಧ್ಯಕ್ಷರು ಹಾಗೂ ಕಾನೂನು ಮಂಡಳಿತ ಅಧ್ಯಕ್ಷರು.

ಇವರನ್ನು ಹೊರತುಪಡಿಸಿ ಸಂಘ ಪ್ರಾರಂಭವಾದ ಹೊಸದರಲ್ಲಿ ನಮ್ಮ ಸಮಾಜದ ಗಣ್ಯರು ಹಾಗೂ ನಿವೃತ್ತಿ ಪಿ.ಯು.ಸಿ. ಬೋರ್ಡಿನ ನಿರ್ದೇಶಕರಾದ ಶ್ರೀ ವಿ.ಬಿ. ಗಾವಂಕರ್ ಹಾಗೂ ಹೊಸ್ಕೇರಿ ಗ್ರಾಮದ ಗಣ್ಯರು ಹಾಗೂ ಸ್ವಾತಂತ್ರ್ಯ ಯೋಧರು ಆದ ಶ್ರೀ ಜೋಗಿ ಬೀರಣ್ಣ ನಾಯಕ ಇವರನ್ನು ಸಹ ನಮ್ಮ ಸಮಾಜ ಬೆಂಗಳೂರಿನ ಸರ್ವಸದಸ್ಯರ ಸಭೆಗೆ ಆಹ್ವಾನಿಸಿ ಸನ್ಮಾನಿಸಲಾಗಿರುತ್ತದೆ. ಅವರುಗಳು ಸಹ ಸದರಿ ಸಭೆಯನ್ನು ಉದ್ದೇಶಿಸಿ ನಾಡವರ ಗುಣಗಳ ಬಗ್ಗೆ ಮನಮುಟ್ಟುವಂತೆ ತಿಳಿಸಿಕೊಡುವುದರ ಜೊತೆಗೆ ಮುಂದಿನ ಪೀಳಿಗೆ ಜೀವನದಲ್ಲಿ ಯಾವ ರೀತಿ ಶಿಸ್ತನ್ನು ರೂಢಿಸಿಕೊಳ್ಳಬೇಕೆಂದು ಕಿವಿಮಾತು ಹೇಳಿರುವುದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.

2. ಯಕ್ಷಗಾನ:

ಪ್ರತಿವರ್ಷ ಸಮಾಜವು ಬೇರೆ ಬೇರೆ ಯಕ್ಷಗಾನ ತಂಡವನ್ನು ಕರೆಯಿಸಿ ನಮ್ಮ ಸಮಾಜದ ಸದಸ್ಯರಲ್ಲಿಯೂ ಇದರ ಅಭಿರುಚಿ ಹೆಚ್ಚುವಂತೆ ಮಾಡಿ ಕರಾವಳಿಯ ಕಲೆಯನ್ನು ಪ್ರೋತ್ಸಾಹಿಸಲಾಗುತ್ತಿದೆ. ತಂಡದ ಜೊತೆಗೆ ನಮ್ಮ ಸಮಾಜದ ಸದಸ್ಯರ ಮಕ್ಕಳೂ ಸಹ ಭಾಗವಹಿಸಿ ಉತ್ತಮ ಪ್ರದರ್ಶನ ನೀಡುತ್ತಿರುವುದು, ನಮ್ಮ ಸಮಾಜಕ್ಕೆ ಹೆಮ್ಮೆಯ ವಿಷಯವಾಗಿರುತ್ತದೆ.

3. ಸದಸ್ಯರುಗಳಿಗೆ ಪ್ರವಾಸ:

ನಾಡವರ ಸಮಾಜ ಸ್ಥಾಪನೆಯಾದಾಗಿನಿಂದ ಹತ್ತು ಹಲವಾರು ವಿವಿಧ ಪ್ರವಾಸಿ ಸ್ಥಳಗಳಿಗೆ ಒಂದು ದಿನದ ಪ್ರವಾಸವನ್ನು ಆಯೋಜಿಸಲಾಗುತ್ತಿದೆ. ಸದರಿ ಪ್ರವಾಸದಲ್ಲಿ ಕುಟುಂಬ ಸಮೇತರಾಗಿ ಪಾಲ್ಗೊಂಡ ಸದಸ್ಯರು ಹಿರಿ-ಕಿರಿಯರೆನ್ನದೆ ಒಟ್ಟಾಗಿ ಬೆರೆತು, ಸಾಂಸ್ಕೃತಿಕ ಹಾಗೂ ಕ್ರೀಡಾ ಚಟುವಟಿಕೆಗಳಲ್ಲಿ, ಮನರಂಜನಾ ಕಾರ್ಯಕ್ರಮಗಳಲ್ಲಿ ತೊಡಗಿಸಿಕೊಂಡು, ಹರಟೆ-ಮಾತುಕತೆಗಳೊಂದಿಗೆ ತಮ್ಮ ಕಷ್ಟ-ಕಾರ್ಪಣ್ಯಗಳನ್ನು ಮರೆತು ನಗುನಗುತ್ತಾ ಕಾಲಕಳೆದು, ಸುಂದರ ನೆನಪುಗಳೊಂದಿಗೆ ತಮ್ಮ ಮನೆಗಳಿಗೆ ವಾಪಾಸ್ಸಾಗುವ ಕಾರ್ಯವು ಈ ಪ್ರವಾಸದಿಂದ ಸಾಧ್ಯವಾಗಿರುತ್ತದೆ. ಒಟ್ಟಾಗಿ ಬಸ್ಸಿನಲ್ಲಿ ಪ್ರಯಾಣಿಸುವ, ಒಟ್ಟಾಗಿ ಕುಳಿತು ಊಟ ಮಾಡುವ,ಚಿಕ್ಕ ಮಕ್ಕಳ ಆಟಗಳನ್ನು ನೋಡಿ ಆನಂದಿಸುವ ಅವಕಾಶ ಈ ಪ್ರವಾಸದಿಂದ ಸಿಗುತ್ತಿದೆ.

4. ನಾಡವರ ಬಾಡ್ಮಿಂಟನ್ ಟೂರ್ನಮೆಂಟ್:

ಇತ್ತೀಚೆಗೆ ಅಂದರೆ, ಕಳೆದ ಐದಾರು ವರ್ಷಗಳಿಂದ ನಾಡವರ ಸಮಾಜ, ಬೆಂಗಳೂರಿನ ಯುವಕರು ಶ್ರೀ ಶಿವಪ್ಪ ಪಿ. ನಾಗರಕಟ್ಟೆ ಇವರ ಸಾರಥ್ಯದಲ್ಲಿ, ಸಹಾಯ-ಸಹಕಾರದೊಂದಿಗೆ ಹಾಗೂ ಸಮಾಜದ ಸದಸ್ಯರುಗಳ ಧನ ಸಹಾಯದಿಂದ ನಾಡವರ ಬಾಡ್ಮಿಂಟನ್ ಟೂರ್ನಮೆಂಟನ್ನು ಅಂತ್ಯಂತ ಯಶಸ್ವಿಯಾಗಿ ನಡೆಸಿಕೊಂಡು ಬರುತ್ತಿದ್ದಾರೆ. ಈ ಟೂರ್ನಮೆಂಟ್‌ಗೆ ರಾಜ್ಯ ವಿವಿಧ ಭಾಗಗಳಿಂದ ಸುಮಾರು 25 ರಿಂದ 30 ತಂಡಗಳು ಆಗಮಿಸಿ, ಸ್ಪರ್ಧೆಯಲ್ಲಿ ಭಾಗವಹಿಸಿ, ಕಾರ್ಯಕ್ರಮದ ಯಶಸ್ಸಿಗೆ ಕಾರಣೀಭೂತರಾಗುತ್ತಿದ್ದಾರೆ. ಟೂರ್ನಮೆಂಟ್‌ನಲ್ಲಿ ಭಾಗವಹಿಸುವ ತಂಡಗಳಿಗೆ ಪ್ರವೇಶ ಶುಲ್ಕವನ್ನು ನಿಗದಿಪಡಿಸಿದ್ದು, ಸಂಗ್ರಹಗೊಂಡ ಮೊತ್ತವನ್ನು ಇದೇ ಕಾರ್ಯಕ್ರಮಕ್ಕಾಗಿ ವಿನಿಯೋಗಿಸಲಾಗುತ್ತಿದೆ. ನಾಡವರ ಬಾಡ್ಮಿಂಟನ್ ಟೂರ್ನಮೆಂಟನಲ್ಲಿ ನುರಿತ ನಿರ್ಣಾಯಕರನ್ನು ನೇಮಕಮಾಡಿಕೊಳ್ಳಲಾಗುತ್ತಿದೆ. ಕ್ರೀಡೆಯಲ್ಲಿ ಉತ್ತಮ ಸಾಧನೆ ಮಾಡಿದ ಸಾಧಕರನ್ನು ಈ ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಗಳನ್ನಾಗಿ ಕರೆಯಿಸಿ, ಅವರಿಂದ ನಮ್ಮ ಸಮಾಜದ ಯುವಪೀಳಿಗೆಗೆ ಮಾರ್ಗದರ್ಶನ ಒದಗಿಸಿ, ಅನುಭವಗಳನ್ನು ಹಂಚಿಕೊಳ್ಳುವ ವ್ಯವಸ್ಥೆ ಮಾಡಲಾಗುತ್ತಿದೆ. ನಮ್ಮ ಸಮಾಜದ ಯುವ ಪ್ರತಿಭೆಗಳು ವರ್ಷದಿಂದ ವರ್ಷಕ್ಕೆ ಈ ಕ್ರೀಡಾಸ್ಪರ್ಧೆಯಲ್ಲಿ ಭಾಗವಹಿಸುತ್ತಿದ್ದು, ಅವರನ್ನು ಹುರಿದುಂಬಿಸಲು ಅವರುಗಳ ಕುಟುಂಬದವರು ಭಾಗಹಿಸಿ ಪ್ರೋತ್ಸಾಹಿಸುತ್ತಿದ್ದಾರೆ. ಪುರುಷರು-ಮಹಿಳೆಯರು, ಹಿರಿಯರು-ಕಿರಿಯರು, ಹೀಗೆ ಎಲ್ಲಾ ವರ್ಗದವರಿಗೆ ವಯೋಮಿತಿ ಆಧಾರದ ಮೇಲೆ ಸ್ಪರ್ಧೆಗಳನ್ನು ನಡೆಸಲಾಗುತ್ತಿದೆ. ಪ್ರತಿವರ್ಷ ಸಮಾಜದ ಸದಸ್ಯರಲ್ಲಿ ಕೆಲವರನ್ನು ಅತಿಥಿಗಳನ್ನಾಗಿ ಆಯ್ಕೆ ಮಾಡಿಕೊಂಡು, ಸ್ಪರ್ಧಾಳುಗಳ ಪರಿಚಯ ಮಾಡಿಕೊಡಲಾಗುತ್ತದೆ. ಅತಿಥಿಗಳು ಸಹ ಆಟಗಾರರನ್ನು ಹುರಿದುಂಬಿಸಿ ಪ್ರೋತ್ಸಾಹಿಸುತ್ತಿದ್ದಾರೆ. ನಾಡವರ ಬಾಡ್ಮಿಂಟನ್ ಟೂರ್ನಮೆಂಟನಲ್ಲಿ ಭಾಗವಹಿಸುವ ಎಲ್ಲರಿಗೂ ಟೀ, ಕಾಫೀ, ಲಘು ಉಪಹಾರ ಹಾಗೂ ಊಟದ ವ್ಯವಸ್ಥೆಯನ್ನು ಅಚ್ಚುಕಟ್ಟಾಗಿ ಮಾಡಲಾಗುತ್ತಿದೆ. ಸಮಾಜದ ಸದಸ್ಯರುಗಳು ಈ ಕಾರ್ಯಕ್ರಮಕ್ಕೆ ಅಗತ್ಯವಾದ ಧನಸಹಾಯ ಮಾಡುತ್ತಿದ್ದು, ಇನ್ನೂ ಕೆಲವರು ಬಹುಮಾನಗಳ ಮೊತ್ತವನ್ನು ತಾವುಗಳು ಪ್ರಾಯೋಜಿಸುವ ಮೂಲಕ ಕಾರ್ಯಕ್ರಮವು ಯಶಸ್ವಿಯಾಗಿ ನಡೆಯಲು ಕಾರಣಕರ್ತರಾಗಿದ್ದಾರೆ. ನಾಡವರ ಬಾಡ್ಮಿಂಟನ್ ಟೂರ್ನಮೆಂಟನಲ್ಲಿ ಹಲವಾರು ರೀತಿಯ ಬಹುಮಾನಗಳನ್ನು ವಿವಿಧ ಸ್ಪರ್ಧೆಗಳಲ್ಲಿ ಗೆದ್ದವರಿಗೆ ನೀಡಲಾಗುತ್ತಿದೆ. ಸ್ಮರಣಿಕೆ ಹಾಗೂ ನಗದು ರೂಪದಲ್ಲಿಯೂ ಬಹುಮಾನ ನೀಡಲಾಗುತ್ತಿದೆ. ನಾಡವರ ಸಮಾಜ ಬೆಂಗಳೂರು ವತಿಯಿಂದ ಪ್ರಥಮ ಬಹುಮಾನವನ್ನು ನೀಡಲಾಗುತ್ತಿದೆ. ಸದರಿ ಕಾರ್ಯಕ್ರಮದ ನಂತರದಲ್ಲಿ ಉಳಿಯುವ ಹೆಚ್ಚುವರಿ ಹಣವನ್ನು ಸಮಾಜದ ಖಾತೆಗೆ ಜಮಾ ಮಾಡಲಾಗುತ್ತಿದೆ.

ಸಾಮಾಜಿಕ ಕಾರ್ಯಕ್ರಮಗಳು:

1. ವೈದ್ಯಕೀಯ ನೆರವು:

ನಾಡವರ ಸಮಾಜ ಬೆಂಗಳೂರು, ಇದು ಸಾಮಾಜಿಕ ಬದ್ಧತೆಯನ್ನು ಹೊಂದಿದ್ದು, ಬೆಂಗಳೂರಿನಲ್ಲಿ ವಾಸಿಸುವ ನಾಡವರ ಜೊತೆಗೆ ವಿವಿಧ ಊರುಗಳಲ್ಲಿ ವಾಸಿಸುತ್ತಿರುವ ನಾಡವರದಲ್ಲಿ ಯಾರಾದರೂ ತೀವ್ರತರನಾದ ಖಾಯಿಲೆಗೆ ತುತ್ತಾಗಿ, ವೈದ್ಯಕೀಯ ಚಿಕಿತ್ಸೆ ಪಡೆಯಲು ಸಾಧ್ಯವಾಗದ ಕಡುಬಡವರನ್ನು ಗುರುತಿಸಿ, ಅವರ ಕೋರಿಕೆಯ ಮೇರೆಗೆ ರೂ.25,000/- ಗಳನ್ನು ಮೀರದಂತೆ ಹಲವಾರು ಜನರಿಗೆ ವೈದ್ಯಕೀಯ ನೆರವನ್ನು ನೀಡುತ್ತಾ ಬಂದಿದೆ. ಸದರಿ ನೆರವನ್ನು ಪಡೆಯಲು ಅರ್ಹವಲ್ಲದ ಪ್ರಕರಣವೊಂದರಲ್ಲಿ ಮಾನವೀಯತೆಯಿಂದ ಶ್ರೀ ಎಂ.ಆರ್. ನಾಯ್ಕ್ರವರು ತಮ್ಮ ಕೈಯಾರೆ ರೂ.25,000/- ಗಳನ್ನು ನೀಡಿರುತ್ತಾರೆ. ಸಮಾಜದ ಬಡವರಿಗೆ ವೈದ್ಯಕೀಯ ನೆರವನ್ನು ನೀಡುವ ಸಲುವಾಗಿ ಪ್ರತ್ಯೇಕ ಮೆಡಿಕಲ್ ಫಂಡ್ ಅನ್ನು ಸ್ಥಾಪಿಸಿದ್ದು, ಇದಕ್ಕಾಗಿ ಈ ಹಿಂದೆ ಯಕ್ಷಗಾನವನ್ನು ಏರ್ಪಡಿಸಿ ಹಣವನ್ನು ಸಂಗ್ರಹಿಸಲಾಗಿರುತ್ತದೆ.

2. ನೆರೆ ಸಂತ್ರಸ್ತರಿಗೆ ನೆರವು:

ಈ ಹಿಂದೆ ಕಾಳಿನದಿಗೆ ನೆರೆ ಬಂದಾಗ, ಕಾರವಾರದ ಸುತ್ತಮುತ್ತಲಿನ ಹಳ್ಳಿಗಳ ಸಂತ್ರಸ್ತರಿಗೆ ಶ್ರೀ ಬಿ.ಟಿ. ನಾಯಕ, ಶ್ರೀ ದಿನೇಶ ಗಾಂವಕರ ಹಾಗೂ ಇತರರ ತಂಡ, ಸಮಾಜದ ಸದಸ್ಯರಿಂದ ಹಣವನ್ನು ಸಂಗ್ರಹಿಸಿ, ಕಾರವಾರ ನಾಡವರ ಸಮಾಜದ ಸದಸ್ಯರು ಹಾಗೂ ರೋಟರಿ ಕ್ಲಬ್ ಇವರ ಸಹಯೋಗದೊಂದಿಗೆ ಸಂತ್ರಸ್ತರಿಗೆ ಅಗತ್ಯವಾದ ಅಕ್ಕಿ, ಬೆಡ್‌ಶೀಟ್, ರಗ್ಗುಗಳನ್ನು ಒದಗಿಸಲು ಸಹಾಯ ಮಾಡಿರುತ್ತಾರೆ. ಶರಾವತಿ ನದಿಗೆ ನೆರೆ ಬಂದಾಗ, ನಾಡವರ ಸಮಾಜ ಬೆಂಗಳೂರು, ಇದರ ಕೆಲವು ಸದಸ್ಯರು ಶ್ರೀ ಬಿ.ಟಿ.ನಾಯಕ್‌ರವರ ನೇತೃತ್ವದಲ್ಲಿ ಅಲ್ಲಿಯ ಪುನರ್ವಸತಿ ಕೇಂದ್ರಗಳಿಗೆ ಭೇಟಿ ನೀಡಿ ಕೆಲವು ಅಗತ್ಯ ವಸ್ತುಗಳನ್ನು ಒದಗಿಸಿದ್ದಲ್ಲದೇ, ತಮ್ಮ ಕೈಲಾದ ಸಹಾಯವನ್ನೂ ಮಾಡಿರುತ್ತಾರೆ. ಇತ್ತೀಚೆಗೆ ಎರಡು ವರ್ಷಗಳ ಹಿಂದೆ ಅಂಕೋಲಾ ತಾಲೂಕಿನ ಸಿರೂರಿನಲ್ಲಿ ಗುಡ್ಡ ಕುಸಿತದಲ್ಲಿ ನಿರಾಶ್ರಿತರಾದ ಉಳುವರೆ ಗ್ರಾಮಕ್ಕೆ ಸಮಾಜದ ಅಧ್ಯಕ್ಷರಾದ ಶ್ರೀ ಅರವಿಂದ ನಾಯಕರವರ ನೇತೃತ್ವದಲ್ಲಿ, ಕಾರ್ಯಕಾರಿ ಸಮಿತಿಯ ಸದಸ್ಯರು ಭೇಟಿ ನೀಡಿದ್ದು, ಊರ ನಾಗರೀಕರ ಸಮ್ಮುಖದಲ್ಲಿ ಸಂತ್ರಸ್ತರನ್ನು ಭೇಟಿ ಮಾಡಿ, ಸಾಂತ್ವನ ಹೇಳಿ, ಸಮಾಜದ ವತಿಯಿಂದ ಕೈಲಾದ ಸಹಾಯವನ್ನು ಮಾಡಿರುತ್ತಾರೆ. ಈ ಕಾರ್ಯಕ್ಕೆ ಬೆಂಗಳೂರು ಉತ್ತರ ಕನ್ನಡ ಸಂಘವೂ ಸಹ ಕೈಜೋಡಿಸಿದ್ದು, ಇದರಿಂದ ಯಶಸ್ವಿಯಾಗಿ ಸೇವೆ ಸಲ್ಲಿಸಲು ಸಾಧ್ಯವಾಗಿರುತ್ತದೆ.

3. ಬೆಂಗಳೂರು ನಾಡವರ ಆರೋಗ್ಯ ಶಿಬಿರ

ನಮ್ಮ ಬೆಂಗಳೂರು ನಾಡವ ಸಮಾಜ ಬಾಂಧವರಿಗಾಗಿ ಶ್ರೀಯುತ ಡಿ ಎನ್ ನಾಯಕ ಹೆಲ್ತ್ ಡಿಪಾರ್ಟ್ಮೆಂಟ್ ನ ಸೆಕ್ರೆಟರಿ ಇದ್ದಾಗ ಅವರ ಮುಂದಾಳತ್ವದಲ್ಲಿ ಕೆ ಸಿ ಜನರಲ್ ಹಾಸ್ಪಿಟಲ್ ಅಲ್ಲಿ ಒಂದು ದಿನದ ಆರೋಗ್ಯ ಶಿಬಿರವನ್ನು ಏರ್ಪಡಿಸಿದ್ದೆವು. ಸುಮಾರು ಮುನ್ನೂರಕ್ಕೂ ಹೆಚ್ಚಿನ ಸಮಾಜ ಬಾಂಧವರು ಅದರ ಪ್ರಯೋಜನ ಪಡೆದುಕೊಂಡಿದ್ದರು.ಮುಂದಿನ ದಿನಗಳಲ್ಲಿ ವರ್ಷಕ್ಕೊಂದು ಆರೋಗ್ಯ ಶಿಬಿರ ಏರ್ಪಡಿಸುವ ಯೋಜನೆಯು ಜೋಡಣೆಯ ಹಂತದಲ್ಲಿದೆ.

4. ಕೋವಿಡ್ ಸಂದರ್ಭದಲ್ಲಿ ಆನ್ಲೈನ್ ವೆಬಿನಾರ್

ಶ್ರೀ ಜೀವನಕುಮಾರ್ ಗಾಂವಕರ ಕಾರ್ಯಕಾರಿ ಸಮಿತಿ ಅಧ್ಯಕ್ಷರಾಗಿದ್ದ ಸಂದರ್ಭದಲ್ಲಿ ನಮ್ಮ ಸಮಾಜದ ಸುಮಾರು ಆರಕ್ಕೂ ಹೆಚ್ಚು ನುರಿತ ವೈದ್ಯರನ್ನು ಆನ್ಲೈನ್ ಜೂಮ್ ಮೀಟಿಂಗ್ ಗೆ ಆಹ್ವಾನಿಸಿ ಅವರೊಂದಿಗೆ ನಮ್ಮ ಸಮಾಜ ಬಾಂಧವರಿಗೆ ಚರ್ಚೆಗೆ ಅವಕಾಶ ಕಲ್ಪಿಸಲಾಗಿತ್ತು. ಜಗತ್ತಿಗೆ ಮಹಾಮಾರಿಯಾದ ಕೋವಿಡ್ ರೋಗದ ತಡೆ, ಅದರ ಕುರಿತಾದ ಕಾಳಜಿಯ ಚರ್ಚೆಯಲ್ಲಿ ಸುಮಾರು 150 ಕ್ಕೂ ಹೆಚ್ಚಿನ ಜನ ಜೂಮ್ ಮೀಟಿಂಗ್ ಹಾಗು ಸಾವಿರಕ್ಕೂ ಹೆಚ್ಚಿನ ಜನ ಯೌಟ್ಯೂಬ್ ಲೈವ್ ಅಲ್ಲಿ ವೀಕ್ಷಿಸಿದ್ದು ಬಹುಪ್ರಯೋಜನಕಾರಿಯಾಗಿ ಕಾರ್ಯಕ್ರಮ ಮೂಡಿಬಂದಿತ್ತು.

5. ಸಮಾಜದಿಂದ ಪರಿಸರ ಸ್ನೇಹಿ ಕಾರ್ಯಕ್ರಮಗಳು:

ನಾಡವರ ಸಮಾಜ ಬೆಂಗಳೂರು, ಇದು ಶ್ರೀ ಜೀವನ ಕುಮಾರ ಗಾಂವಕರ ಇವರು ಅಧ್ಯಕ್ಷರಾಗಿದ್ದ ಸಮಯದಲ್ಲಿ ಸಮಾಜದ ಬಾಂಧವರನ್ನು ಸೇರಿಸಿ ಬೆಂಗಳೂರಿನ ನಂದಿನಿ ಬಡಾವಣೆಯಲ್ಲಿನ ಪಾರ್ಕಿನಲ್ಲಿ ಗಿಡ ನೆಡುವ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಿತ್ತು.ಸದರಿ ಪಾರ್ಕಿನ ಹತ್ತಿರದಲ್ಲಿಯೇ ನಮ್ಮ ಸಮಾಜದ ಸದಸ್ಯರಾದ ಶ್ರೀ ಕೆ.ಆರ್. ನಾಯಕ್‌ರವರ ಮನೆಯಿದ್ದು, ನೆಟ್ಟ ಗಿಡಗಳಿಗೆ ನೀರು ಗೊಬ್ಬರ ಹಾಕಿ ಬೆಳೆಸುವ ಜವಾಬ್ದಾರಿಯನ್ನು ಸ್ವತಃ ಅವರೇ ವಹಿಸಿಕೊಂಡಿದ್ದು, ಸದರಿ ಗಿಡಗಳು ಚೆನ್ನಾಗಿ ಬೆಳೆದು ದೊಡ್ಡದಾಗಿ ಹಚ್ಚಹಸಿರಾಗಿ ಕಾಣುತ್ತಿರುವುದು ಸಂತೋಷದ ವಿಷಯವಾಗಿದೆ. ಇದೇ ಅವಧಿಯ ಇನ್ನೊಂದು ಸಂದರ್ಭದಲ್ಲಿ ಶ್ರೀ ಎಂ.ಆರ್. ನಾಯ್ಕ್ರವರ ನೇತೃತ್ವದಲ್ಲಿ ಅಂಕೋಲಾ ತಾಲೂಕಿನ ಹಿಚ್ಕಡ ಹಾಗೂ ಕೋಡ್ಯಾಣಿ ಗ್ರಾಮದಲ್ಲಿ ನೂರಾರು ಗಿಡಗಳನ್ನು ನೆಡಲಾಯಿತು. ಎರಡೂ ಕಡೆಗಳಲ್ಲಿ ಪ್ರತ್ಯೇಕ ಸಭೆಗಳನ್ನು ನಡೆಸಿ, ಸುತ್ತಮುತ್ತಲಿನ ಊರ ನಾಗರೀಕರು, ಹಿರಿಯರು ಹಾಗೂ ಮಂಡಲ ಪಂಚಾಯತಿಯ ಅಧ್ಯಕ್ಷರು / ಸದಸ್ಯರುಗಳ ಸಮ್ಮುಖದಲ್ಲಿ ಗಿಡಗಳನ್ನು ನೆಡುವ ಕಾರ್ಯಕ್ರಮವನ್ನು ಊರ ನಾಗರೀಕರ ಸಹಕಾರದೊಂದಿಗೆ ಯಶಸ್ವಿಯಾಗಿ ನಡೆಸಿ, ಪರಿಸರದ ಮೇಲಿರುವ ನಮ್ಮ ಕಾಳಜಿಯನ್ನು ವ್ಯಕ್ತಪಡಿಸಲಾಯಿತು. ಸದರಿ ಕಾರ್ಯಕ್ರಮಕ್ಕೆ ಪರಿಸರ ಪ್ರೇಮಿಗಳಾದ ಶ್ರೀ ಸುರೇಶ ಹೆಬ್ಳಿಕರ್ ಹಾಗೂ ಶ್ರೀ ಸುಕ್ರಿ ಬೊಮ್ಮ ಗೌಡರವರನ್ನು ಆಮಂತ್ರಿಸಲಾಗಿತ್ತು. ಇವರುಗಳ ಉಪಸ್ಥಿತಿಯು ಈ ಕಾರ್ಯಕ್ರಮಕ್ಕೆ ಇನ್ನಷ್ಟು ಮೆರುಗನ್ನು ತಂದುಕೊಟ್ಟಿತ್ತೆಂದರೆ ತಪ್ಪಾಗಲಾರದು.